vo bulaaye.n to kyaa tamaashaa ho
ham na jaaye.n to kyaa tamaashaa ho
ye kinaaro.n se khelane vaale
Duub jaaye.n to kyaa tamaashaa ho
bandaa_parvar jo ham pe guzarii hai
ham bataaye.n to kyaa tamaashaa ho
aaj ham bhii terii vafaao.n par
muskuraaye.n to kyaa tamaashaa ho
terii suurat jo ittefaaq se ham
bhuul jaaye.n to kyaa tamaashaa ho
vaqt kii chand sa’ate.n ‘Sagar’
lauT aaye.n to kyaa tamaashaa ho
Poet of the Poems/Ghazal or Nazam:Sagar Siddiqui
No comments:
Post a Comment