Tay honge kis tarah ye marahil kaha na jae
is teergi mein kya hai muqabil kaha na jae
khud de diye hain main ne use hath kat kar
wo likh diya hai jo sar-e-mahafil kaha na jae
pathar hue wo lafz ke the jite jagate
is khamashi se kya hua hasil kaha na jae
ab tak to chal rahen hain tere sath sath hum
aayengi kis jagah had-e-fasil kaha na jae
nasha hai ya ke zeher fiza mein mila hua
kuch hai har ek cheez mein shamil kaha na jae
aakhir kaheen to baith gaye panv tod kar
phir kya kahenge agar ise manzil kaha na jae
ye aur baat kuch bhi dikhai na de sake
aankhen khuli hui hon to gafil kaha na jae
Poet of the Poem / Ghazal or Nazam : Shehzad Ahmed
No comments:
Post a Comment