Phirta liye chaman mein hai divanapan mujhe
zanjir-e-pa hai mauj-e-nasim-e-chaman mujhe
hun shama ya ki shola khabar kuch nahi magar
fanus ho raha hai mera pairahan mujhe
kuche mein teri kon tha leta bhala khabar
shab chandani ne aake pahanaya kafan mujhe
dikhalata ik ada mein hai sau-sau tarah banav
kis sadapan ke sath, tera bankapan mujhe
aaya hun nur leke main bazm-e-sukhan mein ‘zauq’
aankhon pe sab bithayenge ahal-e-sukhan mujhe
Poet of the Poem / Ghazal or Nazam : Ibrahim Zauq
No comments:
Post a Comment