Din dhal chuka tha aur parinda safar mein tha
sara lahu badan ka ravan khisht-o-par mein tha
had-e-ufaq pe sham thi kheme mein muntazar
aansu ka ik pahad sa hail nazar mein tha
jate kahan ki raat ke bahen thin mushtail
chupate kahan ki sara jahan apne ghar mein tha
lo wo bhi narm ret ke tile mein dhal gaya
kal tak jo ek koh-e-giran rahguzar mein tha
utara tha vahashi chidiyon ka lashkar zamin par
phir ik bhi narm pat na sare shahar mein tha
pagal si ik sada kisi ujade makan mein thi
khidaki mein ik chirag bhari dopahar mein tha
us ka badan tha khoon ke hiddat se sholafish
suraj ka ik gulab sa tisht-e-sahar mein tha
Poet of the Poem / Ghazal or Nazam : Wazeer Agha
No comments:
Post a Comment