ae meri hamraqs mujh ko tham le
zindagi se bhag kar aaya hun main
dar se larazan hun kaheen aisa na ho
raqsgah ke chor daravaze se aakar zindagi
dhundh le mujh ko nishan pa le mera
aur jurm-e-aish karte dekh le
ae meri hamraqs mujh ko tham le
raqs ke ye gardishen
ek mubaham aasiya ke daur hain
kaisi sargarmi se gham ko raundata jata hun main
jee mein kehta hun ki han
raqsgah mein zindagi ke jhankane se peshtar
kulfaton ka sangreza ek bhi rahane na paye
ae meri hamraqs mujh ko tham le
zindagi mere liye
ek khuni bhediye se kam nahi
ae hasin-o-ajanabi aurat usi ke dar se main
ho raha hun lamha lamha aur bhi tere qarib
janata hun tu meri jan bhi nahi
tujh se milane ka phir imkan bhi nahi
tu meri aarazuon ke magar tamsil hai
jo rahi mujh se gurezan aj tak
ae meri hamraqs mujh ko tham le
ahad-e-parina ka main insan nahi
bandagi se is dar-o-divar ke
ho chuki hain khvahishen be-soz-o-rang-o-natavan
jism se tere lipat sakata to hun
zindagi par main jhapat sakata nahi
is liye ab tham le
ae hasin-o-ajanabi aurat mujhe ab tham le
Poet of The Poem / Ghazal or Nazam :Noon Meem Rashid
No comments:
Post a Comment