Mera tamam fan meri kavish mera riyaz
ik na-tamam geet ke misre hain jin ke bich
mani ka rabt hai na kisi kafiye ka mel
anjam jis ka tay na hua ho ik aisa khel
meri mata bas yahi jadu hai ishq ka
sikha hai jis ko main ne badi mushkilon ke sath
lekin ye sahir-e-ishq ka tohfa ajeeb hai
khulata nahi hai kuch ke haqiqat mein kya hai ye
taqadir ke ata hai ya koi saza hai ye
kis se kahen ae jan ke ye qissa ajeeb hai
kahane ko yun to ishq ka jadu hai mere pas
par mere dil
ke vaste itna hai is ka bojh
sine se ik pahad-sa hatata nahi hai ye
lekin asar ke bab mein halka hai is qadar
tujh pe agar chalaun to chalata nahi hai ye
Poet of the Poem / Ghazal or Nazam : Amjad Islam Amjad
No comments:
Post a Comment