aa ke patthar to mere sahan mai do-char gire
jitane us ped ke phal the pas-e-divar gire
aisi dahashat thi fazaon mai khule pani ke
aankh jhapaki bhi nahi hath se patavar gire
mujhe girana hai to main apane hi qadamon mai girun
jis tarah saya-e-divar pe divar gire
tiragi chod gaye din mai ujale ke khutut
ye sitare mere ghar tut ke bekar gire
dekh kar apane dar-o-bam laraz uthata hun
mere hamsaye mai jab bhi koi divar gire
vaqt ke dor khuda jane kahan se tute
kis ghadi sar pe ye lataki hui talvar gire
hum se takara gai khud badh ke andhere ke chattan
hum sambhalkar jo bahut chalate the nachar gire
hath aaya nahi kuch rat ke daldal ke siva
hai kis mod pe khvabon ke parastar gire
kya kahun dida-e-tar ye to mera chehara hai
sang kat jate hain barish ke jahan dhar gire
dekhate kyon ho ‘shakeb’ itani bulandi ke taraf
na uthaya karo sar ko ki ye dastar gire
Poet of the Poem / Ghazal or Nazam :Shakeb Jalali
No comments:
Post a Comment