Wo lab ki jaise sagar-o-sahaba dikhai de
jumbish jo ho to jam chalakata dikhai de
dariya mein yun to hote hain qatre hi qatre sab
qatara wohi hai jisamen ke dariya dikhai de
kyon aaina kahen use pathar na kyon kahen
jis aaine mein aks na usaka dikhai de
us tashna-lab ke neend na tute dua karo
jis tashna-lab ko khwab mein dariya dikhai de
kaisi ajeeb shart hai didar ke liye
aankhen jo band hon to wo jalava dikhai de
kya husn hai, jamal hai, kya rang-rup hai
wo bheed mein bhi jaye to tanaha dikhai de
Poet of the Poem / Ghazal or Nazam : Krishan Bihari Noor
No comments:
Post a Comment