chehare pe mere zulf ko phailao kisi din
kya roz garajate ho baras jao kisi din
razon ke tarah utaro mere dil mein kisi shab
dastak pe mere hath ke khul jao kisi din
pedon ke tarah husn ke barish mein naha lun
badal ke tarah jhum ke ghir aao kisi din
khushbu ke tarah guzaro mere dil ke gali se
phoolon ke tarah mujh pe bikhar jao kisi din
phir hath ko khairat mile band-e-qaba ke
phir lutf-e-shab-e-vasl ko doharao kisi din
guzaren jo mere ghar se to ruk jayen sitare
is tarah meri rat ko chamakao kisi din
main apani har ik sans usi rat ko de dun
sar rakh ke mere sine pe so jao kisi din
Poet of the poem/ghazal or Nazam: Amjad Islam Amjad
No comments:
Post a Comment